الموسم الذهبي للفول البلدي

السنة دي سقف الإنتاجية مفتوح، والفدان يقدر يوصل لـ 15 – 18 أردب لو التزمنا بالحماية من الأمراض والآفات والتنفيل!

خلينا نركز مع بعض شوية لأن الموسم ده هو موسم الفول التاريخي بإذن الله.

#أولاً: مواعيد الزراعة

الميعاد الصح هو مفتاح النجاح، عشان الطقس هو اللي بيحكم نشاط الحشرات والأمراض، وبيأثر كمان على التزهير والعقد.

المواعيد المناسبة كالآتي:

الوجه البحري والدلتا وسيناء: من 10 لحد 25 نوفمبر

الجيزة والفيوم: من 30 أكتوبر لحد 20 نوفمبر

مصر الوسطى (بني سويف – المنيا – أسيوط): من 20 أكتوبر لحد 15 نوفمبر

جنوب الصعيد (قنا – الأقصر – أسوان – الوادي الجديد): من 25 أكتوبر لحد 10 نوفمبر

لو الأرض فيها هالوك نأخر الميعاد 10 لـ 15 يوم عشان نقلل الإصابة.

#ثانياً: الخريطة الصنفية – كل منطقة وليها صنفها الصح

اختيار الصنف المناسب هو اللي بيكمل المعادلة:

الوجه البحري والدلتا: جيزة 716 – جيزة 843 – مصر 1 – سخا 4 – نوبارية 1 إلى 5 – مريوط 2

الجيزة والفيوم: جيزة 716 – جيزة 843 – مصر 1 – سخا 1

مصر الوسطى: جيزة 716 – جيزة 843 – مصر 1

جنوب الصعيد: جيزة 716 – جيزة 843 – مصر 1 – وادي 1

أفضل الأصناف الموسم ده:

جيزة 716: مبكر، مقاوم للتبقع والصدأ، ومحصوله عالي.

جيزة 843: مقاوم للهالوك، قوي في الأراضي المصابة.

مصر 1: صنف حديث، مقاوم للهالوك والأمراض الورقية.

سخا 1: ممتاز للوجه البحري ومصر الوسطى، بذوره كبيرة وسهلة التسويق.

نوبارية 1: مثالي للأراضي الجيرية والجديدة.

#ثالثاً: التلقيح البكتيري = سر قوة النبات

الفول من أكتر المحاصيل اللي بتستفيد من التلقيح بالعقدين (بكتيريا العقد الجذرية).

التقاوي للفدان تحتاج:

كيس واحد في الأراضي القديمة.

2 إلى 3 أكياس في الأراضي الجديدة أو المستصلحة.

أهم النقاط:

حضّر محلول لاصق (سكر أو صمغ + مية).

اخلط التقاوي مع العقدين في مكان ظليل.

ازرع خلال ساعة واحدة بعد المعاملة.

اروي على طول بعد الزراعة.

نجاح التلقيح يعني تكون عقد جذرية حمراء من جوه = نبات قوي مش محتاج آزوت كتير.

#رابعاً: الزراعة والتخطيط

التخطيط 12 خط في القصبتين.

الزراعة على الريشتين كل 25 سم ببذرتين في الجورة.

أو الزراعة على 3 ريش كل 15 سم ببذرة واحدة.

الهدف: 20 – 22 نبات في المتر المربع.

ممكن كمان تزرع الفول محمّل على قصب السكر بنفس الطريقة بس بخطوط متوازية.

#خامساً: الري

أول رية (المحاياة): بعد 30 – 45 يوم حسب نوع التربة.

الري على الحامي دايمًا، ووقف الري وقت المطر.

أهم حاجة وقت التزهير والعقد، لأن العطش أو الغرق هيقلل المحصول.

#سادساً: التسميد

15 كجم نيتروجين للفدان (جرعة تنشيطية) عند الزراعة.

استخدم سلفات النشادر خصوصًا في الأراضي الجديدة.

بلاش إفراط في اليوريا لأنها بتزود التبقع وتمنع تكوين العقد.

اللي أرضه غنية بالمادة العضوية ممكن يستغنى عن الآزوت خالص.

#سابعاً: مكافحة الحشائش

ضد الزمير والنجيلية: فيوزيليد سوبر بمعدل 500 سم³ للفدان.

ضد الهالوك: راوند أب 48% بمعدل 75 سم³ للفدان (رشتين بينهم 3 أسابيع).

الرش يكون بالرشاشة الظهرية مش بالموتور.

#ثامناً: الحماية من الأمراض والآفات

الموسم ده الجو متقلب = نشاط عالي للمن والذبابة البيضاء = خطر فيروسات!

كمان لازم نحذر من:

(( التبقع البني والصدأ - أعفان الجذور والذبول - الهالوك)) .

الحل: الالتزام بمواعيد الزراعة + الزراعة بأصناف مقاومة + التلقيح البكتيري الجيد + المتابعة الأسبوعية.

#خلاصة_الكلام:

الموسم ده فعلاً موسم ذهبي للفول البلدي …

الجو في صالح المحصول، والأرض جاهزة، والإنتاجية مفتوحة.

بس النجاح مرهون بالالتزام بالتوصيات والحماية من الآفات والأمراض.

أستاذ دكتور / محمد علي فهيم

رئيس مركز معلومات تغير المناخ

27 أكتوبر 2025م – 17 بابه 1742ق – 5 جمادى أول 1447هـ